ភ្នំពេញ៖ ប្រធានក្រុមឧត្តមប្រឹក្សាព្រះមហាក្សត្រសម្ដេចតេជោ ហ៊ុន សែន បានរំលឹកពីនៃការជួបគ្នាឡើងវិញរវាងសម្ដេច និងភរិយាជាមួយនឹងកូនច្បងរបស់សម្ដេចគឺនាយករដ្ឋមន្ត្រីបច្ចុប្បន្នសម្ដេចធិបតី ហ៊ុន ម៉ាណែត កាលពី ៤៥ឆ្នាំមុន (២៤ កុម្ភៈ ១៩៧៩-២៤ កុម្ភៈ ២០២៤)។
ក្នុងសារដែលបានបង្ហោះនៅលើបណ្ដាញសង្គមរបស់សម្ដេចតេជោនៅព្រឹកថ្ងៃទី២៤ ខែកុម្ភៈ ឆ្នាំ២០២៤នេះ សម្ដេចតេជោបានឲ្យដឹងថា នៅល្ងាចថ្ងៃទី២៤ ខែកុម្ភៈ ឆ្នាំ១៩៧៩ គឺជាពេលដែលសម្ដេច និងសម្ដេចកិត្តិព្រឹទ្ធបណ្ឌិត ព្រមទាំងសម្ដេចធិបតី ហ៊ុន ម៉ាណែត ជួបជុំគ្នាឡើងវិញ។ ទោះជាយ៉ាងណាសម្ដេចធិបតី ហ៊ុន ម៉ាណែត នៅពេលនោះមិនទាន់មានភាពស្និទស្នាលជាមួយសម្ដេចតេជោនោះទេដោយសារភាពនៅក្មេងខ្ចី ហើយក៏មិនឲ្យសម្ដេចតេជោប៉ះម្ដាយផងដែរ។
បើទោះជាយ៉ាងណាសម្ដេចនៅតែព្យាយាមបង្កើតភាពស្និទ្ធស្នាលជាមួយកូន ហើយនៅល្ងាចនោះស្ករគ្រាប់ចំនួន ១០គ្រាប់ដោយសម្ដេចខំប្រឹងរកមកដ៏លំបាកនាបានក្លាយជាចំណុចចាប់ផ្ដើមនៃភាពស្និទស្នាលរវាងសម្ដេចតេជោ និងសម្ដេចធិបតីឡើងវិញ ទោះជាយ៉ាងណាកូនប្រុសម្នាក់នេះមិនទាន់ឲ្យសម្ដេចគេងនៅជាមួយនៅឡើយទេ ដោយសម្ដេចត្រូវរង់ចាំរហូតដល់កូនគេងលក់ទើបសម្ដេចអាចទៅគេងជុំគ្រួសារបាននឹងត្រូវក្រោកឲ្យបានមុនកូននៅពេលព្រឹក។
សម្ដេចតេជោថា សម្ដេចត្រូវធ្វើបែបនេះចំនួន ១០ថ្ងៃទើបបានអាចជួបជុំស្និទ្ធស្នាលជាមួយគ្រួសារឡើងវិញ។
នេះគ្រាន់តែជាឧទាហរណ៍មួយនៃគ្រួសារសម្ដេចដែលរងគ្រោះដោយសង្គ្រាមនិងអំពើប្រល័យពូជសាសន៍។
សម្ដេចថា ពលរដ្ឋកម្ពុជាគ្រប់រូបត្រូវតែការពារសន្តិភាពដែលបានមកដោយលំបាកនេះឲ្យខានតែបានទោះត្រូវបង់ដោយតម្លៃណាក៏ដោយ៕
